Շոկոլադը երջանկության բանաձև՞ . Նատալի Գոնչար-Խանջյան

«Երջանկության բանաձևը մեր մեջ է, սիրելու, ոգևորվելու մեջ է, կյանքի ուրախությունները սրտաբաց ընդունելու, աշխարհի ու ինքներս մեզ հետ ներդաշնակ լինելու մեր ունակության մեջ է»,- Med-Practic-ի հետ զրույցում ասել է հոգեբան Նատալի Գոնչար-Խանջյանը, պատասխանելով մեր հարցին, թե շոկոլադը պարունակո՞ւմ է երջանկության բանաձև:

Հոգեբանը հայտնել է, որ շոկոլադը, ինչպես մի շարք այլ մթերքներ, պարունակում է էնդորֆին հորմոնը, որը կարճ ժամանակով պարգևում է հաճելի զգացողություն: Հայտնաբերվել է, որ սիրահարված մարդու օրգանիզմում նույնպես արտադրվում է էնդորֆին:

Հոգեբանի ձևակերպմամբ, երբ սիրահարությանը (Աստված մի արասցե) փոխարինում է հիասթափությունը, երեկվա սիրհարը այդ հորմոնի պակասը հնարավոր է լրացնի շոկոլադով: 

«Որքան էլ որ տարօրինակ թվա, շոկոլադ վայելելը հինգ զգայարանների մեդիտացիայի տեխնիկայի մաս է կազմում: Համի միջոցով մեդիտացիան հնարավորություն է տալիս գիտակցել մեր զգացմունքների ու սնունդի միջև կապը»,- նշել է Ն. Գոնչար-Խանջյանն ու խորհուրդ տվել` շոկոլադն ուտել վայելելով: Ըստ հոգեբանի, հարկ է ուշադրություն դարձնել, թե ինչպես է շոկոլադի փոքրիկ կտորը ձեր լեզվի վրա փոխում իր տեսքը, պետք է զգալ նրա բույրը, ըմբոշխնել համն իր բոլոր նրբերանգներով:

«Ցանկացած մեդիտացիայի հաջողության գաղտնիքը նրա պարբերականության և մարդու կենտրոնանալու ունակության մեջ է: Այնպես որ, շոկոլադի սիրահարները հանգիստ կարող են ուտել իրենց սիրելի քաղցրավենիքը, բայց չափավոր», -զգուշացրել է հոգեբանը:

Հարցեր, պատասխաններ, մեկնաբանություններ